Saltar navegación
voluntariadogalego.org. Teléfono do Voluntariado: 900 400 800 voluntariadogalego.org. Teléfono Solidario: 900 400 800

Novas


(30-10-2019)

Política Social fomenta o voluntariado como ferramenta para mellorar a inclusión das persoas xordo-cegas

A directora xeral de Xuventude, Participación e Voluntariado, Cristina Pichel, asinou un protocolo de colaboración coa Federación de Asociacións de Persoas Xordas de Galicia.

◾O obxectivo desta iniciativa é ampliar a colaboración coas sete entidades que traballan neste eido na nosa Comunidade, fomentando a participación das persoas voluntarias nos seus proxectos.
◾Así mesmo, poñeranse en marcha dous cursos de lingua de signos para favorecer unha mellor atención a este colectivo

A directora xeral de Xuventude, Participación e Voluntariado, Cristina Pichel, asinou esta mañá un protocolo de colaboración co presidente da Federación de Asociacións de Persoas Xordas de Galicia, Iker Sertucha, para promover o voluntariado na atención ás persoas xordo-cegas.

Esta entidade ten presenza nas sete cidades de Galicia ao contar con asociacións na Coruña, Ferrol, Santiago de Compostela, Lugo, Ourense, Pontevedra e Vigo. A través deste acordo preténdese fomentar que as persoas voluntarias se sumen ás actividades que se desenvolven en calquera das asociacións e, tamén, axudar a formalas na adquisición duns coñecementos mínimos da lingua de signos e doutras competencias que faciliten a comunicación e a socialización destas persoas.

Deste xeito, o desenvolvemento desta iniciativa persegue a sensibilización da sociedade para eliminar o illamento social e comunicativo das persoas xordo-cegas e xordas en situación de exclusión social, así como potenciar o valor da figura da persoa voluntaria. O obxectivo da Xunta de Galicia é establecer unha canle de participación entre institucións para beneficio das persoas máis vulnerables e da sociedade galega no seu conxunto.

Os cursos de comunicación en lingua de signos realizaranse ao longo do mes de novembro de maneira presencial e en liña, para o que se ofrecerán 15 e 30 prazas respectivamente. Os cursos estarán compostos por 30 horas e permitirán establecer contactos sociais elementais. Na formación estableceranse contidos programáticos, gramaticais, léxicos e socioculturais.

xunta de galicia
© Xunta de Galicia. Información mantida e publicada na internet pola Xunta de Galicia
Oficina de Rexistro Único e Información | Suxestións e queixas | Aviso legal | Atendémolo/a
Formato RSS 2.0 Pode subscribirse as novidades desta web cun lector de feeds