Saltar navegación
voluntariadogalego.org. Teléfono do Voluntariado: 900 400 800 voluntariadogalego.org. Teléfono Solidario: 900 400 800

Novas


(10-06-2019)

Fabiola García destaca que o programa Voluntariado Miúdo impulsa a educación en valores das pequenas e pequenos

A conselleira de Política Social deu a benvida aos máis de 200 alumnas e alumnos que acudiron a este encontro no Parque do Lago da Cidade da Cultura.

1320 escolares de 12 centros diferentes puxeron en marcha este ano proxectos de acción voluntaria.
Desenvolveron iniciativas solidarias, un obradoiro de reanimación cardiopulmonar (RCP), actividades que fomentan os xogos tradicionais e defenden o coidado e respecto polos animais.

A conselleira de Política Social, Fabiola García, destacou hoxe o papel do programa Voluntariado Miúdo para impulsar a educación en valores das pequenas e pequenos. Fíxoo no encontro que reuniu a máis de 200 participantes desta iniciativa e que tivo lugar no Parque do Lago da Cidade da Cultura.

Fabiola García agradeceu tanto ao alumnado como ao profesorado o seu esforzo por poñer en marcha diferentes accións de voluntariado durante este curso, que reforzan o carácter solidario de Galicia e que impulsan nos cativos e cativas valores como o traballo en equipo, o respecto pola natureza e o patrimonio ou o altruísmo.

Nesta edición máis de 1320 alumnos e alumnas de 12 centros diferentes puxeron en marcha iniciativas. Entre elas, destacan algunhas como un proxecto de patios inclusivos, que busca eliminar as dificultades que se poidan encontrar as nenas e nenos con discapacidade; un obradoiro para aprender a técnica da reanimación cardiopulmonar (RCP) na aula e actividades que fomentan os xogos tradicionais e defenden o coidado e respecto polos animais.

A conselleira salientou que Galicia é unha das comunidades de referencia no ámbito do voluntariado, posto que na actualidade máis de 8000 persoas son voluntarias e.

Así mesmo, recordou que a participación en accións voluntarias en Galicia non ten idade, xa que abrangue todas as franxas, desde os máis maiores ata os máis pequenos, un feito que enriquece a sociedade galega. Por iso, garantiu o apoio da Xunta de Galicia a programas como Voluntariado Miúdo que consolidan a solidariedade e a hospitalidade como dúas das características que mellor definen á comunidade.

Cultura solidaria


O programa Voluntariado Miúdo pretende promover os valores da cultura solidaria e a adquisición de diversas competencias fundamentais para o alumnado, a través da acción voluntaria cun impacto directo no seu entorno. Desde que esta iniciativa se puxo en marcha, en 2015, ao abeiro do Plan Proxecta, aumentou considerablemente os seus participantes.

Ademais, neste tempo, incluíu temáticas moi diversas que van desde a protección ambiental e animal, a igualdade e a coeducación, a diversidade, actividades interxeracionais, culturais e de recuperación de xogos tradicionais.

Centros participantes


Os centros participantes nesta edición foron: o CEIP Emilia Pardo Bazán e o CEIP Juan Fernández Latorre, ambos da Coruña; o Centro Rural Agrupado de Ribadumia; o CEIP Plurilingüe San Marcos, de Abegondo; o CPR Plurilingüe Divina Pastora, de Ourense; o CEIP Plurilingüe Os Casais, de Fene; o CPI Plurilingüe Laureano Prieto, de A Gudiña; o CPR Plurilingüe Virxe da Cela, de Monfero; o CPR Plurilingüe Padres Somancos, de A Guarda; o CEIP San Tomé, de Cambados; o CPR Plurilingüe Landro-Viveiro e o CEIP Plurilingüe Isidro Parga Pondal, de Oleiros.

xunta de galicia
© Xunta de Galicia. Información mantida e publicada na internet pola Xunta de Galicia
Oficina de Rexistro Único e Información | Suxestións e queixas | Aviso legal | Atendémolo/a
Formato RSS 2.0 Pode subscribirse as novidades desta web cun lector de feeds