Saltar navegación
voluntariadogalego.org. Teléfono Solidario: 900 400 800 voluntariadogalego.org. Teléfono Solidario: 900 400 800

Novas


(15-11-2017)

A Xunta fomenta o voluntariado nos centros de ensino a través do programa ‘Pasaporte Solidario’

A directora xeral de Xuventude, Participación e Voluntariado, Cecilia Vázquez, entregou hoxe os diplomas ao alumnado do IES de Beade de Vigo que participou na iniciativa.

Destinado ao alumnado tanto de Primaria como da ESO, ten como obxectivos principais promover valores como a solidariedade, a participación ou o compromiso social, entre outros.

No curso académico 2016/2017 contou coa implicación directa de 1339 alumnos e alumnas de ata 12 anos repartidos en 22 centros educativos das catro provincias galegas.

No instituto vigués de Beade as accións desenvolvidas foron, entre outras, a recollida de tapóns para Nair, a elaboración de vídeos contra o bulling e a violencia de xénero, obradoiros de reciclaxe ou xuntanzas do club de convivencia.

A directora xeral de Xuventude, Participación e Voluntariado da Xunta de Galicia, Cecilia Vázquez Suárez, reuniuse na xornada de hoxe no IES de Beade co profesorado e alumnado participantes na sexta edición do programa ‘Pasaporte Solidario’. O obxectivo desta visita foi o de facer entrega dos diplomas acreditativos da súa implicación nesta iniciativa da Consellería de Política Social, que no curso académico 2016/2017 contou coa participación directa de 1339 estudantes de ata 12 anos repartidos en 22 centros educativos das catro provincias galegas.

A directora xeral, que presenciou unha das actividades de dinamización programadas ao abeiro deste programa, lembrou que os principais obxectivos de ‘Pasaporte Solidario’ son os de promover valores de solidariedade, participación, compromiso social e voluntariado entre a comunidade educativa (pais, nais, profesorado e alumnado) e favorecer que o alumnado se comprometa como voluntarios e voluntarias a través dunha metodoloxía activa e participativa, que os achegue a realidade do voluntariado.

No ‘Pasaporte Solidario’ os e as participantes plasman as súas experiencias persoais nun documento adaptado para esta finalidade, no que se reflicten diferentes niveis de acción e compromiso voluntario e no que se inclúe unha modalidade específica relacionado co Camiño de Santiago. Este documento serve, igualmente, de rexistro de cada unha das accións solidarias realizadas ao longo do curso escolar. Aquelas persoas que rematan satisfactoriamente o seu itinerario de solidariedade reciben un documento acreditativo que recoñece a súa participación no programa.

No caso concreto do IES de Beade as intervencións desenvolvidas de fomento da solidariedade no centro incluíron, entre outras as seguintes: recollida de tapóns para Nair, elaboración de vídeos contra o bullying e a violencia de xénero, obradoiros de reciclaxe ou xuntanzas do club de convivencia.

Con este proxecto, subliñaba Cecilia Vázquez, “preténdese que a mocidade teña a posibilidade de levar a cabo un itinerario de accións voluntarias completo e continuo, que comeza en primaria con ‘Móvete’, segue co ‘Pasaporte Solidario’, dirixido a mozos de ata 12 anos, continúa coa Rede de Centros Solidarios para estudantes de secundaria, e complétase co Servizo de Voluntariado Xuvenil, que se prolonga ata os 30 anos”.

A responsable dos programas autonómicas de Xuventude, Participación e Voluntariado indicou que ‘Pasaporte Solidario’ se inicia de novo este curso 2017/2018 na súa sétima edición. Neste sentido, indicou que está habilitada na web www.voluntariadogalego.org un enlace ao dito programa co fin de que aqueles centros que aínda non se teñan incorporado a esta iniciativa, poidan facelo ou obter máis información. Así mesmo, a Consellería de Política Social dispón do teléfono gratuíto 900 400 800 para resolver todas cantas dúbidas ou cuestións poidan aparecer ao respecto.

xunta de galicia
© Xunta de Galicia. Información mantida e publicada na internet pola Xunta de Galicia
Oficina de Rexistro Único e Información | Suxestións e queixas | Aviso legal | Atendémolo/a
Formato RSS 2.0 Pode subscribirse as novidades desta web cun lector de feeds