Saltar navegación
voluntariadogalego.org. Teléfono Solidario: 900 400 800 voluntariadogalego.org. Teléfono Solidario: 900 400 800

Novas


(26-01-2017)

Cecilia Vázquez reúnese en Ourense con entidades do eido do voluntariado e a mocidade para mellorar os servizos do Espazo Xove da cidade

A directora xeral de Xuventude, Participación e Voluntariado, Cecilia Vázquez, mantivo esta semana en Ourense varias xuntanzas de traballo coas asociacións máis representativas da provincia no ámbito da mocidade, fomento da participación e voluntariado. Segundo explicaba hoxe a responsable desta área no Goberno autonómico “foi unha primeira toma de contacto co obxectivo de ampliar as actividades e iniciativas a realizar no Espazo Xove da Cidade das Burgas”.

Todas as asociacións coas que se reuniu a directora xeral presentan unha gran variedade en canto ás actividades que realizan e en canto aos campos de actuación sobre os que traballan e que pasan polo medioambiente, a prevención e inclusión social, voluntariado, diversidade funcional, ocio e tempo libre, emprego ou formación entre outros.

Esta toma de contacto coas asociacións máis representativas de Ourense forma parte do proceso de renovación total dos programas e das accións desenvoltas pola Dirección Xeral, e no que se quere contar coa participación dos diversos axentes sociais para establecer e ofrecer un amplo abano de recursos de educación non formal durante o ano 2017 á mocidade no que teñan cabida todos os colectivos.

Así as cousas, e segundo o acordado nestes encontros, as entidades achegarán ate o vindeiro día 3 de febreiro as súas propostas de actuación no centro e tras estudalas, priorizarase a elección daquelas que se poidan levar a cabo dun xeito máis inmediato.

No transcurso do encontro, Cecilia Vázquez, tamén propuxo a posibilidade de incluír actividades onde haxa convivencia entre persoas maiores e mocidade, para que ambas xeracións poidan nutrirse de experiencias e coñecementos mutuos, e así dar respostas interxeneracionais á sociedade ourensá.

xunta de galicia
© Xunta de Galicia. Información mantida e publicada na internet pola Xunta de Galicia
Oficina de Rexistro Único e Información | Suxestións e queixas | Aviso legal | Atendémolo/a
Formato RSS 2.0 Pode subscribirse as novidades desta web cun lector de feeds